មន្ត្រីប៉ុស្តិ៍នគរបាលអន្តោប្រវេសន៍ ចែកម៉ាស់ការពារវីរូសផ្លូវដង្ហើម(កូរ៉ូណា)រយៈពេល៤ថ្ងៃអស់ជាង៧ម៉ឺនម៉ាស់
31-January-2020 | ដោយ ពលមនសិការ
បន្ទាយមានជ័យ៖ មន្ត្រីនគរបាលអន្តោប្រវេសន៍ បានចែកម៉ាស់ការពារវីរូសផ្លូវដង្ហើម(កូរ៉ូណា) រយៈពេល៤ថ្ងៃអស់ជាង៧ម៉ឺនម៉ាស់ និងបន្តចែករហូតអស់១លានម៉ាស់ នៅច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ។
លោកឧត្តមសេនីយ៍ត្រី អ៊ី ចំរើន នាយប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិប៉ោយប៉ែតបានប្រាប់នៅថ្ងៃទី៣០ ខែមករា ឆ្នាំ២០២០ថា ដោយបានការណែនាំពីឯកឧត្តម អគ្គនាយក នៃអគ្គនាយកដ្ឋាននគរបាលអន្តោប្រវេសន៍ មន្ត្រីប៉ុស្តិ៍នគរបាលអន្តោប្រវេសន៍ បានចែកម៉ាស់ជូនភ្ញៀវជាតិ និងអន្តរជាតិដែលឆ្លងកាត់តាមច្រកទ្វារអន្តរជាតិប៉ោយប៉ែត ចាប់ពីថ្ងៃទី២៧ ដល់៣០ ខែមករា ឆ្នាំ២០២០ អស់ប្រមាណជាង៧ម៉ឺនម៉ាស់ ហើយម៉ាស់នៅសល់បន្តចែករហូតអស់។
លោកបានថ្លែងអំណគុណចំពោះសប្បុរសជនដែលបានជួយឧបត្ថម្ភម៉ាស់ដល់ប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត ខេត្តបន្ទាយមានជ័យ នៅពេលដែលវីរូសឆ្លងតាមប្រព័ន្ធផ្លូវដង្ហើម(វីរូសកូរ៉ូណា)ដែលកំពុងឆ្លងតាមបណ្តាប្រទេសក្នុងពិភពលោក។
លោកឧត្តមសេនីយ៍ត្រី អ៊ី ចំរើន បានបញ្ជាក់ថា៖មន្ត្រីប៉ុស្តិ៍នគរបាលអន្តោប្រវេសន៍ច្រកទ្វារអន្តរជាតិប៉ោយប៉ែត បានសហការល្អជាមួយមន្ត្រីពេទ្យចត្តាឡីស័ក និងឯកឧត្តម អ៊ុំ រាត្រី អភិបាលខេត្តបន្ទាយមានជ័យ និងអភិបាលក្រុងប៉ោយប៉ែតរួមជាមួយមន្ត្រីស្ថាប័នពាក់ព័ន្ធបានចូលរួមចែកម៉ាស់ការពារ និងត្រួតពិនិត្យនៅច្រកទ្វារអន្តរជាតិប៉ោយប៉ែត ដើម្បីទប់ស្កាត់និងការពារវីរូសឆ្លងតាមផ្លូវដង្ហើម(វីរូសកូរ៉ូណា) ៕ដោយ៖ចន្ត្រា
ចំនួនអ្នកទស្សនា
- ថ្ងៃនេះ3691
- ម្សិលមិញ15681
- សប្តាហ៍នេះ62531
- ខែនេះ84411
- ឆ្នាំនេះ84411
- សរុប20526867